Presidenti i Real Madridit, Florentino Pérez, ka paralajmëruar se klubi madrilen është gati të bëjë ofertën më të madhe në historinë e tij për transferimin e një prej futbollistëve më të mirë në botë.

Gjatë një interviste në emisionin “Horizonte” të Iker Jiménez, Pérez zbuloi se “Los Blancos” do të paraqesin së shpejti një ofertë rekord për një lojtar, identiteti i të cilit nuk është bërë publik.

“Do të bëjmë ofertën më të madhe që është bërë ndonjëherë për një futbollist”, deklaroi kreu i klubit madrilen.

Fillimisht u spekulua se objektivi mund të ishte një nga mesfushorët e Paris Saint-Germain, si João Neves apo Vitinha.

Megjithatë, e famshmja spanjolle MARCA thotë se dëshira e madhe e Florentinos është ylli i Bayern Munich, Michael Olise.

Sulmuesi francez me origjinë nga Londra po kalon një periudhë të shkëlqyer dhe konsiderohet si një nga talentet më të mëdhenj në futbollin evropian. Vlera e tij në treg vlerësohet rreth 150 milionë euro, shumë që Real Madridi thuhet se është i gatshëm ta ofrojë.

Megjithatë, transferimi duket tejet i vështirë. Presidenti i Bayernit, Herbert Hainer, e bëri të qartë qëndrimin e klubit gjerman.

“Nëse Florentino dëshiron të na dërgojë një ofertë, mund të kursehet nga mundimi”, deklaroi Hainer.

Real Madridi synon të mbyllë sa më shumë operacione para Kupës së Botës 2026. Klubi tashmë ka emëruar trajnerin e ri, José Mourinho, si dhe ka siguruar transferimet e Ibrahima Konaté dhe Denzel Dumfries.

Nëse madrilenët arrijnë ta bindin Bayernin për shitjen e Olises, atëherë viti 2026 do të hyjë në histori si viti i transferimit më të shtrenjtë të realizuar ndonjëherë nga Real Madridi. Aktualisht, rekordi mbahet nga Jude Bellingham, i cili iu bashkua klubit në vitin 2023 për 127 milionë euro./Arbresh.info